سمنګان ولایت کې د ۲ زره جریبه ځمکې امارتي تثبیت کېدل
د سمنګان ولایت د ځمکې د غصب د مخنیوي تخنیکي هیئت سیمه کې د خپل عملي کار له پیل سره، ددغه ولایت د حضرت سلطان په ولسوالۍ کې ۲ زره جریبه ځمکه امارتي تشخیص کړه.
یاد شوي هیئت خپل کار ددغه ولایت د حضرت سلطان له ولسوالۍ څخه پیل کړ او ددغې ولسوالۍ له ولسوال سره یې د ځمکې د غصب د مخنیوي په اړه وکتل او خبرې یې وکړې. هيئت د کلچه، قزاغلي او کوکه بلاق له کیلیو څخه لیدنه وکړه او ۲ زره جریبه ځمکه یې په دغو سیمو کې امارتي تثبیت کړه چې د هغې ځینې برخې غصب شوي دي.
دغه راز هیئت له سیمه ییزو خلکو سره وکتل او د ځمکې د غصب د مخنیوي په برخه کې د امیرالمومنین حفظه الله د فرمان په اړه معلومات ورکړل او سیمه ییزو خلکو د امیرالمومنین حفظه الله ددغه فرمان هرکلۍ وکړ او ژمنه یې وکړه چې له ځمکو څخه به ساتنه وکړي.
په همدې حال کې، د بامیان ولایت د تخنیکي هیئت ناسته جوړه شوه او په هغې کې ددغه ولایت د جرخشکک ساحې د بررسۍ او لیدنې له پاره له ۶ ادارو څخه یو هیئت تعیین شو. په دغې ناسته کې امنیه قوماندانۍ موظفه شوه چې د قول رباه ساحې کې د کورونو جوړولو د کار مخ ونیسي او د پولیسو له ځانګړې قطعې څخه وغوښتل شول چې د جرخشکک ساحې په بررسۍ کې له هيئت سره ملتیا وکړي.
د اداري اصلاحاتو د آمریت د غصب شوو ځمکو او د ټول ګټو ریاست د غصب شوو ځمکو په اړه هم بحث وشو. هیئت له ټولګټو ریاست څخه سندونه وغوښتل او له یاد ریاست، امنیه قوماندانۍ او د آغا خان له موسسې څخه يې وغوښتل چې خپل استازي معرفي کړي.
پر دې سربېره، د پنجشیر ولایت تخنیکي هیئت ددغه ولایت د عنابه ولسوالۍ له غصب شوو سیمو څخه لیدنه وکړه او د یادې ولسوالۍ له ولسوال، د کیلیو ملکانو او سپین ږیرو سره یې وکتل. دغه راز هیئت له دوو غصب شوو سیمو څخه لیدنه وکړه او ددغو سیمو له متصرفانو څخه یې سندونه وغوښتل.
د زابل ولایت تخنیکي هیئت هم خپله ناسته جوړه کړه او د ښوونې ریاست د ښوونکو د ښارګوټي اړونده ۳۰ جریبه ځمکه یې امارتي تثبیت کړه.
دغه راز یاد هیئت د قلات ښار لویدیځ په تبسخر سیمه کې ۲۰۰ جریبه نوره ځمکه دولتي تثبیت کړه او د دراز قلات سیمه کې يې د ۲۰۰ جریبه ځمکې په اړه د عدم تصرف پریکړه صادره کړه.
