د کنړ ولایت د عدليې ریاست په همکارۍ پنځه تنه د اصلاح له مرکز څخه ازاد شول
د کنړ ولایت د عدليې ریاست د حقوقي مرستو امر د ماشومانو د ساتنې په نوبتي ناسته کې چې د دغه ولایت د کار او ټولنیزو چارو په ریاست کې جوړه شوې وه، د دغې برخې راپور وړاندې کړ او زیاته یې کړه چې د یوې میاشتې په ترڅ کې د دغه امریت په همکارۍ پنځه تنه ماشومان ازاد شوي دي.
په دغې ناسته کې چې د دولتي او غیر دولتي ادارو کارکوونکو ګډون درلود، هرې ادارې د ماشومانو د ساتنې برخه کې خپل کاري راپور وړاندې کړ.
د کنړ ولایت د عدليې ریاست د حقوقي مرستو امر هم د خپل راپور په وړاندې کولو سره وویل چې په روانه میاشت کې ۵ قضیې چې ۲ د قتل قضیې، ۲ د غلا قضیې او ۱ د مجروحیت قضیه په کې شاملې وې دغه امریت ته راجع شوي او یادو موضوعاتو کې د حقوقي مرستو امریت په همکارۍ ۵ تنه د اصلاح له مرکز څخه ازاد شوي دي.
د یادونې وړ ده، چې د عدليې وزارت د حقوقي مرستو برخه په مرکز او ولایتونو کې دنده لري چې بې وزله تورنو او شکمنو له پاره وړیا حقوقي مرستې وړاندې کړي.
