د کنړ او نورستان ولایتونو د تخنیکي هیئتونو ناستې جوړې شوې
د کنړ او نورستان ولایتونو د ځمکو د غصب د مخنیوي د تخنیکي هیئتونو ناستې د دوو تېرو ورځو په ترڅ کې د هیئتونو د رئیسانو او غړو په حضور سره جوړې شوې او د ځمکو د غصب د مخنیوي په برخه کې لازم تصمیمونه ونیول شول.
د کنړ ولایت د تخنیکي هیئت په ناسته کې د بحر آباد د ذکورو لیسې موضوع بررسي شوه او یو څلور کسیز ټیم موظف شو ترڅو له نږدې له ساحې څخه لیدنه او بررسي ترسره کړي او خپل راپور راتلونکې ورځ وړاندې کړي.
د شونکړۍ ساحې د موضوع په اړه هم بحث وشو او پریکړه وشوه چې هیئت ساحې ته ولاړ شي او له نږدې څخه د ساحې بررسي ترسره کړي او وروسته لازم تصمیم ونیسي.
دغه راز ښاروالۍ او د ټولګټو ریاست ترمنځ د موضوع په اړه پریکړه وشوه چې راتلونکې غونډې ته له دواړو ادارو څخه استازي حاضر شي او خپل سندونه او دلایل وړاندې کړي.
په دغې ناسته کې د پوهنتون موضوع هم بررسي شوه او هم تخنیکي هیئت راتلونکې غوڼدې ته، د خوړو د مدیرت استازې له دغې ادارې څخه د استول شویو دوسیو په تړاو وغوښتل شو.
په همدې حال کې د نورستان ولایت د ځمکو د غصب د مخنیوي د تخنیکي هیئت ناسته جوړه شوه او د هیئت غړو په کې د تېرې اوونۍ د فعالیتونو په اړه بحث او خبرې وکړې.
یاد تخنیکي هیئت د فعالیتونو پر پیاوړتیا ټینګار وکړ او پریکړه یې وکړه چې ژر تر ژره د نورستان له والي سره غونډه جوړه کړل شي او د مهمو موضوعاتو په اړه له نوموړي سره خبرې او مشوره وشي.
