د کندز ولایت د ځمکو د غصب د مخنیوي د تخنیکي هیئت ناسته جوړه شوه
د کندز ولایت د ځمکو د غصب د مخنیوي د تخنیکي هیئت ناسته د روژې میاشت په ۱۱ نېټه د یکشنبې په ورځ ، د هیئت د رئیس او غړو او ددغه ولایت د ټولو ولسوالیو د کرنې مدیرانو په حضور سره جوړه او د بېلابېلو موضوعاتو په اړه په کې بحث وشو.
په دغې ناسته کې د اجارې ورکولو تصویب او نافذ شوې کړنلاره، د ځمکو بانک کې د استرداد شویو ځمکو ثبت او د استرداد شویو ځمکو د اجارې ورکول بحث لاندې ونیول شو او د کرنې مدیرانو ته پوهاوي ورکړل شو او هغوی خپلو مسوولیتونو ته متوجې کړل شول.
د ولسوالیو د کرنې مدیرانو هم یو شمېر ننګونې او ابهامات بیان کړل او پریکړه وشوه چې له مرکزي کمېسیون څخه په دغې برخه کې لارښوونه وغوښتل شي.
په دغې ناسته کې د قلعه ذال په حلقه کول کې د ۸۷۵ جریبه ځمکې د یو ټوک دوسیې په اړه چې د ولسوالۍ محکمې هغه امارتي تثبیت کړې او د سترې محکمې له لوري هیئت ته راجع شوې، بحث او بررسي وشوه او لازم تصمیمونه ونیول شول.
په همدې توګه د امام صاحب د ولسوالۍ په حلقه کول کې د ۷۵ جریبه ځمکې اجارې ورکولو په اړه چې امارتي تثبیت شوې بحث وکړ. د یادې ځمکې غیر شرعي متصرف د ځمکې اجارې اخیستلو له پاره تیار دی او هیئت دغې برخه کې لازم تصمیمونه ونیول.
