د کابل ښاروالۍ د یوولسمې ناحيې په ریاست کې حقوقي پوهاوي ورکوونې برنامه جوړول
د اسلامي امارت د عدلیې وزارت د حقوقي مرستو ریاست د ۱۴۴۵ هجري قمري کال د محرم الحرام د میاشتې په ۲۲ نېټه د سه شنبې په ورځ د کابل ښاروالۍ د یوولسمې ناحيې په ریاست کې د حقوقي پوهاوي ورکوونې برنامه د عدلیې وزارت د حقوقي مرستو رئيس مولوي رحمت الله حقاني په حضور او د یوولسمې ناحیې د رئیس، د ګذر د وکیلانو د رئیس، د شوراګانو د رئیس او د دغې ناحیې د کارکوونکو په ګډون جوړه کړه.
دغه برنامه د کلام الله مجید د څو آیاتونو په تلاوت سره پیل شوه او په هغې کې د حقوقي مرستو رئیس د دغه ریاست د دندو او واکنو په تړاو خبرې وکړې او ټینګار یې وکړ چې د خلکو او اسلامي امارت ترمنځ د واټن لري کولو له پاره، عدليې وزارت د پوهاوي ورکوونې یو ټیم د دغه ریاست تر چتر لاندې توظیف کړی ترڅو له هیوادوالو سره په دوامداره او اغیزمن ډول په اړیکه کې اوسي او اسلامي شریعت ته په کتلو سره هغوی ته حقوقي موضوعات ورسوي ترڅو له خپلو حقوقو او وجایبو څخه خبر شي او د حقوقي دعواوو په تړاو او ادارو ته د مراجعې په برخه کې له ستونزو سره مخ نه شي.
نوموړي زیاته کړه چې بې وزله شکمن او تورن او یا د هغوی خپلوان کولی شي چې په عدلي او قضایي مراجعو کې د هغوی د حقوقو څخه د دفاع په غرض د حقوقي مرستو له ریاست څخه د حقوقي مرستندوی د توظیف غوښتنه وکړي او دغه راز په کورني موضوعاتو کې بې وزله او بې سرپرسته ښځې او ماشومان هم له دغه حق څخه برخمن دي. په دغې برنامې کې د نشه يې توکو د ممنوعیت او ضرورونو په اړه هم پوهاوی ورکړل شو.
په پای کې د یوولسمې ناحيې رئیس د ګذر د وکیلانو او د یادې ناحیې د کارکوونکو په استازيتوب د دغې برنامې له جوړونکو څخه مننه او قدرداني څرګنده کړه ویې ویل چې د دغه راز برنامو جوړول خلکو له پاره ډیر اغیزمن او ګټور دي.
