د کابل ولایت د پغمان ولسوالۍ له مقاماتو سره د حقوقي مرستو د ریاست د همغږۍ ناسته جوړیدل
د عدليې وزارت د حقوقي مرستو رئیس مولوي حافظ عبدالصمد عمري، د ذوالقعدې میاشتې په ۱۲ نېټه د پنجشنبې په ورځ د عدلیې وزارت د حقوقي مرستو کارکوونکو په نسبت د موجود شک لري کولو او د همغږۍ په منظور د پغمان ولسوالۍ له مقاماتو سره یوه ناسته جوړه کړه.
په دغې ناسته کې، د پغمان ولسوال استاد خالد، د محکمې قاضي او مفتي، د حقوق، د دعوت او ارشاد، د ښوونې، اراضۍ ادارو استازو او د نورو سیمه ییزو ادارو مسؤلینو حضور درلود.
په دغې ناسته کې، د حقوقي مرستو رئیس د دغه ریاست د پلانونو او کاري برنامو له بیان څخه وروسته د پغمان ولسوالۍ د محکمې له قاضي څخه د دغه ریاست له حقوقي مرستندویانو سره د مسؤلانه او نیک چلند په خاطر مننه او قدرداني څرګنده کړه. نوموړي وویل چې د عدلیې وزارت حقوقي مرستندویان د آزاد مدافع وکیلانو په پرتله توپیر لري او د صورت دعوا، دفع دعوا او اعتراضیو په لیکلو او ترتیبولو سره قاضي ته آسانتیاوې رامنځته کوي او د اسلامي شریعت تطبیق او عدالت د پلي کېدلو له پاره غوره زمینه مساعدوي.
دغه راز د حقوقي مرستو رئیس د حقوقي پوهاوي ورکولو برنامو په اړه معلومات ورکړل. ویې ویل چې د افغانستان خلک د خپلو حقونو او مکلفیتونو څخه خبر نه دي او اړتیا شته چې هغوی ته پوهاوی ورکړل شي. نوموړي زیاته کړه چې د عدليې وزارت ځان ژمن او ملزم ګڼي چې خلک له خپلو حقونو او مکلفیتونو څخه خبر کړي.
د پغمان ولسوالۍ مقاماتو د حقوقي مرستو د ریاست برنامې د ټولنې د ښه والي لپاره اغیزمنې او ګټورې وبللې او ژمنه یې وکړه چې د دغې ولسوالۍ ادارې د حقوقي پوهاوي برنامو تطبیق له پاره هر ډول همکارۍ ته چمتو دي.
