د کابل ولایت د سروبي ولسوالۍ له مقاماتو سره د حقوقي مرستو ریاست د همغږۍ ناسته جوړیدل
د عدليې وزارت د حقوقي مرستو رئیس مولوي حافظ عبدالصمد عمري، د ذوالقعدې میاشتې په ۲۴ نېټه د سه شنبې په ورځ د ستونزو حل، د برنامو بیانولو او د ښو کاریو اړیکو رامنځ ته کولو په منظور، د کابل ولایت د سروبي ولسوالۍ له مقاماتو سره یو ناسته جوړه کړه.
په دغې ناسته کې، د سروبي ولسوال الحاج مولوي میر احمد طارق، د محکمې مفتي، امنیه قوماندان، د استخباراتو مسؤل، د علماوو د شورا رئیس، د حج او اوقافو، د ښوونې، کرنې او اراضۍ، د کلیو د چارو او د نورو سیمه ییزو ادارو مسؤلینو حضور درلود.
په دغې ناسته کې، د عدليې وزارت د حقوقي مرستو رئیس د یادې ناستې موخې تشریح کړې، ویې ویل چې د عدليې وزارت د اسلامي امارت او د رعیت ترمنځ د اړیکو پل دی چې له یوې لوري غواړي د اسلامي امارت قوانین، فرمانونه او اصول په غوره توګه پلي شي او له بلې لوري د ادارو له خوا د رعیت حقوق تامین شي.
دغه راز د حقوقي مرستو رئیس وویل چې حقوقي مرستې بې وزله شکمن، تورن، محکوم علیه او مجني علیه لپاره د حقوقي مرستندوی (وړیا مدافع وکیل) توظیف او په ادارو او سیمو کې د حقوقي پوهاوي ورکوونې برنامې جوړولو له لارو هیوادوالو له پاره وړاندې کیږي.
د سروبي ولسوال د حقوقي مرستو ریاست برنامي او کاري موخي وستایلې او ژمنه یې وکړه چې د دغې ولسوالۍ ټولې سیمه ییزې ادارې به د حقوقي مرستو ریاست له کارکوونکو سره لازمې همکارۍ وکړي.
