د ځمکو د غصب د مخنیوي هیئتونو ناسته په درېو ولایتونو کې
د کاپیسا، کنړ او سرپل ولایتونو د ځمکې د غصب د مخنیوي او د غصب شوو ځمکو د تشخیص او تثبیت هیئتونو ناسته د والي، د والي د مرستیال، د کرنې رییسانو، د عدلیې رییسانو، د یادو ولایتونو د سیمه ییزو ادارو رییسانو او مسوولینو او د یادو هیئتونو د نورو غړو په حضور سره جوړې شوې.
په دغو ناستو کې چې د یادو ولایتونو په مقر کې جوړې شوي، د یادو ولایتونو والیانو او د هغوی مرستیالانو د ځمکو د غصب د مخنیوي او د غصب شوو ځمکو د استرداد د مقررې په اړه د عالیقدر امیرالمومنین حفظه الله د فرمان هرکلی وکړ او ملکي، نظامي او تخنیکي هیئتونو ته یې لارښوونه وکړه چې په خپلو کارونو کې د یادې مقررې تطبیق ته لومړیتوب ورکړي.
د کاپیسا او کنړ په ولایتونو کې د حج او اوقافو رییسانو ته دنده ورکړل شوه چې د علماوو له پاره ددغې اوونۍ په جمعې لمانځه کې د عامه شتمنیو د مخنیوي موضوعات وټاکل شي ترڅو خلکو ته په دغې برخه کې پوهاوی ورکړل شي.
دغه راز په کنړ ولایت کې ددغه ولایت کادستر مسوول ته لارښوونه وشوه چې د امارتي ځمکو شمېر راټول کړي او یاد هیئت ته يې وړاندې کړي ترڅو په دغې برخه کې اجراات ترسره شي.
په یادو ناستو کې له یادو هیئتونو سره د هغو والیانو او مرستیالانو د هر راز همکارۍ ډاډ ورکړ.
په دغو ناستو کې د چارو د ښه سرته رسولو په منظور له هر اړخیز بحث څخه وروسته، د غونډو جوړولو څرانګوالي، ددغې موضوع په اړه د جوماتونو له لارې د پوهاوي ورکوونې او د نورو برخو په اړه یو لړ پریکړې او تصامیم ونیول شول.
