د ځمکو د غصب د مخنیوي او د غصب شویو ځمکو د استرداد کمېسیون د ناستې جوړیدل
د ځمکو د غصب د مخنیوي او د غصب شویو ځمکو د استرداد کمېسیون ناسته د جمادي الاول میاشتې په ۲۱ نېټې د سه شنبې په ورځ د عدليې وزارت د سرپرست او د یاد کمېسیون رئیس شیخ الحدیث مولوي عبدالحکیم شرعي په مشرۍ د عدليې وزارت په مقر کې جوړه شوه.
په دغې ناسته کې د کور او ښار جوړلو د وزارت سرپرست مولوي حمد الله نعماني، د کرنې، اوبو لګولو او مالدارۍ د وزارت معین مولوي فضل الباري فضلي، د سرحدونو، قومونو او قبایلو د وزارت معین مولوي محمد اسماعیل غزنوي، د چارو د ادارې لوی رئیس شیخ الحدیث مولوي نورالحق انور، د سترې محکمې استازی شیخ عبدالصمد حقاني، د امارت د قضایاو لوی رئیس او د یاد کمېسیون سکرتر مولوي احسان الله وثیق او د کابل ولایت د تخنیکي هیئت رئیس او غړو او نورو مسؤلینو ګډون درلود.
په دغې ناسته کې، اړوندو موضوعاتو ته د ولایتونو د ځمکو د غصب د مخنیوي د تخنیکي هیئتونو د رسیدنې د څرنګوالي کړنلاره بحث او بررسۍ لاندې ونیول شوه او د یو لړ اصلاحي نظرونو او وړاندیزونو په وړاندې کیدو سره د تایید وړ وګرځیده.
دغه راز په یاده ناسته کې د ځمکو د غصب د مخنیوي قانون د تطبیق په اړه بحث وشو او په دغې برخه کې لازم تصمیمونه ونیول شول.
په ننګرهار، ارزګان او نورو ولایتونو کې د ځمکو د غصب اړوند یو شمېر دوسیې هم په یاده ناسته کې بحث او بررسۍ لاندې ونیول شوې او په هکله یې لازمې پریکړې او تصمیمونه ونیول شول.
