د پکتیکا ولایت له ځینو ساحو څخه د یاد ولایت د ځمکو د غصب د مخنیوي تخنیکي هیئت لیدنه
د پکتیکا ولایت د ځمکو د غصب د مخنیوي تخنیکي هیئت د ذوالحجې د میاشتې په ۲۲ نېټه د دوشنبې په ورځ د یاد ولایت بېلابېلو ساحو ته ولاړ او د دعوا لاندې ساحو د حدوداتو او د سندونو د تطبیق په برخه کې اجراآت ترسره کړل.
هیئت د ۱۰۰ قطعې په نوم پر یوې ټوټې ځمکې د ښاروالۍ او عمران خیل او ایمنی قومونو د سندونو تطبیق په منظور ساحې ته ولاړ او له دواړو لورو سره یې ګډه ناسته جوړه کړه.
هیئت د دواړو لورو سندونه ملاحظه کړل او مشخصه شوه چې د هغو د حدودو په تطبیق کې یو لړ ستونزې شتون لري او پریکړه وشوه چې په دې اړه لا زیاتې څېړنې صورت ومومي. هیئت د مرکز زاول کلي ته هم ولاړ او پر یوې ټوټې ځمکې د دوو اشخاصو دعوا چې یو لوری هغه امارتي او په اجاره ورکړل شوې او بل لوری هغه شخصي بولي، بررسي کړه.
هیئت د ساحې حدودات له سندونو سره سم تعیین کړل او دواړو لورو ته لارښوونه وشوه ترڅو له تصرفاتو څخه ډډه وکړي او د تخنیکي هیئت راتلونکې غونډې ته حاضر شي. تخنیکي هیئت د برمل ولسوالۍ له سرحدې ساحې څخه هم لیدنه وکړه.
