د پکتیکا ولایت عریضه لیکوونکو له پاره یوه ورځنۍ روزنیزه برنامه جوړیدل
د پکتیکا ولایت عدلیې ریاست د یاد ولایت د استیناف محکمې د ریاست په هغمږۍ د ذوالحجې میاشتې په ۱ نېټه د دوشنبې په ورځ د یاد ولایت عریضه لیکوونکو له پاره، یوه ورځنۍ روزنیزه برنامه جوړه کړه.
په دغې برنامې کې، د پکتیکا ولایت عدليې رئيس مولوي حیات الله آمین د موضوع په تړاو خبرې وکړې او د دغې برنامې جوړلو موخه یې د یاد ولایت رسمي ادارو ته د عریضې لیکنې په برخه کې د عریضه لیکوونکو د ظرفیت لوړول وګڼله. نوموړي زیاته کړه که چېرې عریضې په اصولو ولاړې وي، له یو لوري رسمي ادارې د عارضینو غوښتنو ته په وخت رسیدګي کوي او له بل لوري د امارتي ادارو د مسؤلینو د وخت ضایع کیدلو مخنیوی کیږي.
په دغې برنامې کې د یاد ولایت د استیناف محکمې رئیس هم خبرې وکړې او عریضه لیکوونکي خپل مسؤلیتونو او مکلفیتونو ته متوجه کړل.
د یادې برنامې په ترڅ کې عریضه لیکوونکو له پاره د عریضه لیکوونکي د مکلفیتونو، په حقوقي او جزائي موضوعاتو کې د یوې عریضې د کمال او صحت شرطونه، د موضوعي او حوزوي صلاحیتونو پېژندګلوي، پر عریضو حاکم اصول او ادارو کې د سلسله مراتبو په اړه معلومات وړاندې شول.
د یادې برنامې په پای کې، یادو عریضه لیکوونکو د دغې برنامې له جوړونکو څخه مننه وکړه او په راتلونکي کې هم د دغه راز برنامو جوړیدلو غوښتونکي شول.
