د پکتیکا ولایت د عدليې رییس د ارګون ولسوالۍ له موټر پلورونکو سره وکتل
د پکتیکا ولایت د عدليې رییس مولوي حیات الله امین د جمادي الاول میاشت په ۵ نېټه د سه شنبې په ورځ ددغه ولایت ارګون ولسوالۍ له موټر پلورونکو سره د عدلې ریاست په مقر کې وکتل.
په دغې کتنه کې د عدليې رییس د ارګون ولسوالۍ له موټر پلورونکو څخه وغوښتل چې خپل کارونو له اصولو سره سم ترسره کړي او خپل بلانسونه تصفیه کړي. دغه راز له هغه شمېر موټر پلرونکو څخه چې د فعالیت جواز یې نه دی ترلاسه کړي وغوښتل چې، ژر تر ژره دې جواز ترلاسه کړي چې هم اصول مراعات شي او هم یې معامله په قانوني ډول ترسره شي.
د عدليې رییس له یادو موټر پلورونکو څخه وغوښتل چې د پېر او پلور د ثبت کتابچه ددغه ولایت له مستوفیت څخه ترلاسه کړي او خپل ټولې معاملې په دغو کتابچو کې ثبت کړي ترڅو د دولت عواید حیف او میل نشي.
په دغې کتنه کې د یاد ریاست د انسجام مدیر د جواز ترلاسه کولو پروسه هغوی ته تشریح کړه، او زیاته يې کړه چې ټولې قانوني او اصولي آسانتیاوي د هغوی له پاره برابروي.
په دغې کتنه کې یادو موټر پلورونکو د عدلیې ریاست له همکارۍ څخه قدرداني وکړه او ژمنه یې وکړه چې خپل معاملې په قانوني ډول ترسره کوي او ډیر ژر به د قانوني جواز د ترلاسه کولو برخه کې اقدام وکړي.
