د پکتیا ولایت په زندان کې د عامه حقوقي پوهاوي ورکوونې برنامې جوړیدل
د پکتیا ولایت د عدليې ریاست د حقوقي مرستو آمریت، د ذوالقعدې میاشتې په ۱ نېټه د یکشنبې په ورځ د دغه ولایت په زندان کې د عامه حقوقي پوهاوي ورکوونې برنامه جوړه کړه.
په یاده برنامه کې، د پکتیا ولایت د عدليې ریاست د حقوقي مرستو آمر مولوي امین الله او د یاد ریاست د عامه پوهاوي مدیر ګډون کړي وو او دغه زندان کې ۲۰۴ تنو محبوسینو ته یې حقوقي پوهاوی وړاندې کړ.
یاد شوي هیئت لومړی د دغه زندان له مسوولینو سره وکتل او له هغوی څخه یې وغوښتل چې د بې وزلو زندانیانو نوملړ ترتیب کړي او د دغه ولایت د استیناف محکمې له ریاست سره یې شریک کړي ترڅو د هغوی له لوري له عدلیې ریاست سره شریک شي او هغوی له پاره وړیا مدافع وکیل وټاکل شي.
وروسته یاد شوي هیئت په دغه زندان کې د حقوقي پوهاوي ورکوونې برنامه ترسره کړه او د یاد زندان محبوسینو ته یې د دفاع وکالت د تعریف، د وکالت ډولونو او په حقوقي او جزائي قضیو کې د مدافع وکیل د تعیین په اړه پوهاوی ورکړ.
د پکتیا ولایت د زندان مسوولینو د عدليې ریاست له تل پاتې همکاریو څخه مننه وکړه او په راتلونکي کې یې د دغه راز برنامو د جوړیدلو غوښتنه وکړه.
