د پکتیا ولایت له عدلیې ریاست څخه لیدنه
د ولایتونو له عدلیې ریاستونو څخه د لیدنې او څارنې په لړ کې، د عدلیې وزارت د مالي او اداري رئیس ښاغلي مفتي فضل هادي«صاحب زاده» صاحب په مشرۍ د بېلا بېلو ادارو له رئیسانو او استازو څخه جوړ یوه اته کسیز پلاوي پکتیا ولایت ته سفر وکړ.
دغه پلاوي، په لومړي سر کې د پکتیا ولایت د عدلیې ریاست بېلا بېلو برخې ولیدلی او وڅارلی او د دې ریاست د کارکوونکو د مسلکي او اداري کړنو څرنګوالی و څاره او وڅېړه. یاد پلاوي ددې ریاست د اجناسو د موجودې او د کارکوونکو په اړه د معلوماتو ترڅنګ د هغوی ستونزې واورېدی او د حل په منظور یې هغوی ته لازمې لارښوونې وکړې.
همداراز نوموړي پلاوي د پکتیا ولایت د والي مرستیال شیخ صاحب عزیزالرحمن سره وکتل او د عدلیې ریاست اړوندې ستونزې یې ورسره شریکې کړې. د والي مرستیال ژمنه وکړه چې د عدلیې ریاست ستونزو ته به رسیدګي وکړي. په دې کتنه کې د عدلیې ریاست او د پکتیا ولایت د محترم مقام ترمنځ په لا زیاتې همغږۍ ټینګار وشو.
همداراز یاد پلاوي د عدلیې ریاست د ستونزو د شریکولو او د زیاتې همغږۍ په منظور، د دې ولایت له مستوفي او د محکمو له رئیس سره وکتل او په چارو کې د همغږۍ او چټکتیا په منظور یې له یو بل سره خپل نظریات او وړاندیزونه شریک کړل.
