د پکتیا ولایت د عدليې ریاست اداري ناسته جوړه شوه
د پکتیا ولایت د عدليې ریاست میاشتنۍ اداري ناسته د جمادي الثاني میاشته په ۱۰ نېټه د سه شنبې په ورځ د عدليې رییس مولوي محمد رییس محمدي په مشرۍ او ددغه ریاست د آمرینو او کارکوونکو په ګډون جوړه شوه.
دغه ناسته چې د کلام الله مجید د آیاتونو په تلاوت سره پیل شوه، د عدليې رییس د موضوع په اړه خبرې وکړې او د تېرې یوې میاشت لاسته راوړنو، ستونزو او د راتلونکي میاشت د پلان په اړه مفصل معلومات وړاندې کړل.
د عدليې رییس ددغه ریاست کارکوونکو ته توصیه وکړه چې د امربالمعروف له حکمونو څخه اطاعت وکړي او خپل سیرت او صورت له نبوي سنتو سره سم عیار کړي. دغه راز نوموړي د یاد ریاست کارکوونکو ته سپارښتنه وکړه چې متقابل احترام خپلو کې مراعات او خپل دفترونو داخل کې له سیاسي بحثونو څخه ډډه وکړي.
دغه راز د عدليې رییس د ددغه ریاست کارکوونکو ته د رخصت اخیستلو، نورو شعبو کې د کېناستلو، رسمي وختونو ته د پابندي، له بريښنايي بخاریو او منقلونو څخه د عدم استفادې او د آمرینو له امرونو څخه د اطاعت په اړه، لازمې لارښوونې وکړې.
دغې ناسته کې، د عدليې ریاست آمرینو او کارکوونکو خپل ننګونې او ستونزې له عدليې رییس سره شریکې کړې.
د عدليې رییس ددغه ریاست کارکوونکو ته ډاډ ورکړ چې د هغوی د ستونزو د حل برخه کې به له هیڅ ډول هڅو او هاند څخه ډډه و نه کړي.
