د پکتيا ولایت د عدلیې او استیناف محکمې ریاستونو ترمنځ د همغږۍ ناسته جوړیدل
د پکتيا ولایت د عدلیې رئيس مولوي فاتح الله فاتح او مل پلاوي د ربیعالآخر د مياشتې په ۱۹ مه نېټه د یکشنبې په ورځ، د یاد ولایت د استیناف محکمې له رئیس مفتي عبيد الله خالد سره د استيناف محکمې رياست په مقر کې د همغږۍ ناسته جوړه کړه.
په دې ناسته کې چې د یاد ولایت یو شمېر مدافع وکيلانو هم ګډون درلود، د عدلیې رئيس د پکتیا ولایت په محکمو کې د مدافع وکيلانو د ځینو موجودو ستونزو او ننګونو په اړه خبرې وکړې او د حل په برخه کې یې د استيناف محمکې د رياست د همکارۍ غوښتنه وکړه.
په ورته مهال د پکتيا ولایت د استیناف محکمې رئیس د ورته ناستو پر جوړېدو ټينګار وکړ او زیاته یې کړه چې د مدافع وکيلانو ستونزو ته به رسېدنه وکړي.
