د پنجشیر ولایت له والي سره د یاد ولایت د ځمکو د غصب د مخنیوي د تخنیکي هیئت کتنه
د پنجشیر ولایت د ځمکو د غصب د مخنیوي د تخنیکي هیئت رئیس او غړو د ۱۴۴۵ هجري قمري کال د صفرالمظفر د میاشتې په ۶ نېټه د چهارشنبې په ورځ د پنجشیر ولایت له والي حافظ محمد آغا حکیم سره د دغه ولایت په مقر کې وکتل او خبرې يې ورسره وکړې.
په دغې کتنه کې، د پنجشیر ولایت د ځمکو د غصب د مخنیوي د تخنیکي هیئت رئیس د تخنیکي هیئت د کمېټې د اهمیت په تړاو خبرې وکړې او د دغه هیئت د یوې میاشتې د کړنو او لاسته راوړنو راپور یې د پنجشیر ولایت والي ته وړاندې کړ.
دغه راز یاد هیئت خپل ستونزې او وړاندیزونه د دغه ولایت له والي سره مطرح کړل او د یاد ولایت مستوفیت او مقام ترمنځ د ځمکې د دعوا او په دشتک کې د یو جومات د ځمکې موضوع یې له نوموړي سره شریکه کړه او له نوموړي څخه د لارښوونې غوښتونکی شو.
د پنجشیر ولایت والي د یاد ولایت د تخنیکي هیئت له فعالیتونو او لاسته رواړنو څخه مننه او قدرداني څرګنده کړه او هغوی ته یې لارښوونه وکړه چې د یاد ولایت له خلکو سره له خورا زیات زغم او آسانتیا څخه کار واخلي او د یاد ولایت د مستوفیت او مقام ترمنځ د ځمکې د دعوا په اړه له اصولو سره سم رسیدګي وکړي.
دغه راز نوموړي د یو جومات د موضوع په تړاو د دغه ولایت تخنیکي هیئت ته لارښوونه وکړه په هغه صورت کې چې د دغه جومات ځمکه غصب شوې وې، پر هغې د غاصبینو د کار د ځنډولو په تړاو اجراآت وکړي.
