د پروان او زابل ولایتونو د تخنیکي هیئتونو ناستې جوړې شوې
د پروان او زابل ولایتونو د ځمکو د غصب د مخنیوي د تخنیکي هیئتونو ناستې د دوو تېرو ورځو په ترڅ کې جوړې شوې او هم له ځینو ساحو څخه هم لیدنه وشوه.
د پروان ولایت د ځمکو د غصب د مخنیوي د تخنیکي هیئت ناسته د هیئت د رئیس او غړو په حضور سره جوړه شوه او د هیئت د روانو کارونو په اړه په کې بحث وشو.
هیئت د بګرام ولسوالۍ په خم کلان ساحه کې د ۱۸۲۷ کادستري قطعي په تړاو د یو شمېر خلکو سندونه بررسي کړل. دغه راز هیئت د مسعود له ښارګوټي څخه لیدنه وکړه او د هغې د حدودو په مشخص کولو سره يې له غاصبینو څخه سندونه وغوښتل.
په همدې حال کې د زابل ولایت د ځمکو د غصب د مخنیوي د تخنیکي هیئت ناسته د هیئت د رئیس او غړو په حضور سره جوړه شوه او په شاجوی، خاک افغان، نوبهار او شینکۍ ولسوالیو کې د توظیف شويو ټیمونو راپور وړاندې شو.
دغه راز هیئت د قلات ښار په جنوب برخه کې د شخصي او امارتي ځمکو د تفکیک په منظور له خلکو څخه سندونه وغوښتل.
