د ولایتونو د عدلیي ریاستونو د کارکوونکو له پاره د ښوونیز سیمینار جوړیدل
د اسلامي امارت د عدلې وزارت د بشري سرچینو ریاست د ۱۴۴۴ هجري قمري کال د شعبان میاشت په ۲۰ نېټه د یکشنبې په ورځ د ولایتونو د عدليې ریاستونو آمرینو، مدیرانو او مسلکي کارکوونکو له پاره شپږ ورځنی ښوونیز سیمینار ددغه وزارت په مقر کې جوړ کړ.
دغه سیمینار د عدلیې وزارت د بشري سرچینو د ریاست د ښوونو او د ظرفیت لوړولو آمریت لخوا په لار اچول شوی او د میدان وردک، لوګر، پنجشیر، پروان، بامیان او کاپیسا ولایتونو د عدليې ریاستونو ۲۴ تنو آمرینو، مدیرانو او مسلکي کارکوونکو ونډه اخیستې او په اداري او مسلکی برخو کې ښوونیز موضوعات زده کوي.
ددغه سیمینار پرانیست غوڼده کې، د عدليې وزارت مسلکي معین شیخ الحدیث مولوي عبدالکریم حیدر هم برخه اخیستې وه او د موضوع په اړه یې خبرې وکړې. نوموړي ددغه سیمینار له ګډونکوونکو څخه وغوښتل چې له دغه سیمینار څخه اعظمي ګټه پورته کړي او د خپلو چارو په ښه والي کې ورڅخه کار واخلي. دغه راز نوموړي ددغه سیمینار له ګډونکوونکو څخه وغوښتل چې په بشپړ صداقت او ایماندارۍ خلکو ته خدمت وکړي.
په دغه سیمینار کې د ادارې او مدیریت اساسات، د پلان د ترتیب د طرحې څرنګوالي، د عدليې وزارت پیژندنه، اداري مراسلات او د عدليې حقوقي محکمو د اجراآتو اصول نامه د شپږو ورځو په اوږدو کې تدریس کیږي.
