د میدان وردک ولایت د عدليې ریاست او د دغه ولایت د استیناف محکمې د ریاست ترمنځ د همغږۍ د ناستې جوړیدل
د میدان وردک ولایت د عدليې ریاست او د دغه ولایت د استیناف محکمې د ریاست ترمنځ د همغږۍ ناسته د ذوالقعدې میاشتې په ۲ نېټه د دوشنبې په ورځ د میدان ورودک ولایت د عدليې رئیس مولوي مطیع الحق عثماني په مشرۍ او د استیناف محکمې د رئیس مولوي عبدالکریم حقاني، د عدليې ریاست د حقوقي مرستو آمر او حقوقي مرستندوي په ګډون جوړه شوه.
په دغې ناسته کې، د جزايي فورمې پر اساس د حق الله برخه کې د مدافع وکیل ټاکلو له پاره د سترې محکمې د صادر شوي متحدالمال، د دغه ولایت په مرکز او ولسوالیو کې د بې وزلو تورنو له پاره له عدلیې ریاست څخه د حقوقي مرستندوی غوښتل، جزايي برخه کې د حقوقي مساعد د دندو او صلاحیتونو، د هغو تورنو د برخه لیک ټاکل چې په بند کې دي او د حق العبد مدعی یې محکمو ته نه حاضریږي، د عدليې ریاست د عامه حقوقي پوهاي څانګې دنده او له نورو امارتي ادارو سره د چارو ترسره کولو کې د همغږۍ په تړاو بحث او د نظرونو تبادلې ترسره شوې او دغو برخو کې لازم تصمیمونه ونیول شول.
په یاده ناسته کې د دغو دواړو ریاستونو د ترمنځ پر لازیاتې همغږۍ او همکاریو ټینګار وشو او د ستونزو د حل په منظور د دغو داوړو ریاستونو ترمنځ د همغږۍ د ناستې پر جوړلو پریکړه وشوه.
