د میدان وردک ولایت د تخنیکي هیئت د ناستو جوړیدل
د میدان وردک ولایت د تخنیکي هیئت ناستې ددغه هیئت د رئیس او غړو په حضور سره جوړې شوې او یاد شوي هیئت د دوو تېرو کاري ورځو په ترڅ کې جغتو، سید آباد ولسوالیو او د ټوپ دښتې ساحې ته ولاړ او له هغې څخه يې لیدنه وکړه.
دغه هیئت له ځايي مقاماتو، قومي مشرانو او د کلیو له ملکانو سره وکتل او د کمېسیون او تخنیکي هیئت موخه یې هغوی ته بیان کړه او هم یې په ولسوالیو کې د ځمکې د غصب د مخنیوي کمېټې د جوړیدلو په اړه له هغوی سره خبرې وکړې.
یاد شوي هیئت، د غصب د مخنیوي مقررې او د عالیقدر امیرالمومنین حفظه الله د فرمان په اړه هغوی ته معلومات ورکړل او دغې برخه کې یې له هغوی څخه د همکارۍ غوښتنه وکړه. ځايي مسوولینو او قومي مشرانو یو لړ پوښتنې له هیئت څخه مطرح کړې او د همکارۍ ژمنه يې وکړه.
یاد هیئت په جغتو او سید آباد ولسوالیو کې د تخنیکي کمېټې ترکیب اعلام کړ او ویې ویل چې ددغې کمېټې په سر کې ولسوال دی او امنیه قوماندان يې مرستیال دی او د کرنې، حج او اوقافو، د څارنوالۍ، د حقوقو، د ښاروالۍ او د مستوفیت مدیران یې غړي دي. یاده کمېټه له تخنیکي هیئت سره د همکار په توګه همکاري وکړي.
راتلونکې ورځ تخنیکي هیئت د په دریو ولسوالیو (نرخ، سیدآباد او چک) کې د ټوپ دښتې ساحې ته ولاړ او ددغې ساحې ولسوالان، قومي مشران او متصرفین يې وغوښتل.
یاد هیئت له ځايي مشرانو او مسوولینو سره ناسته جوړه کړه او د کمېسیون په اړه یې هغوی ته معلومات ورکړل او د همکارۍ غوښتونکی شو. ځايي مشرانو هم له هیئت سره د همکارۍ ژمنه وکړه.
