د فاریاب ولایت د عدلیې رئیس وپېژندل شو.
د کابل ولایت د حقوقو پخواني رئیس سید غلام محمد رحماني چې په وروستیو کې د فاریاب ولایت د عدليې رئیس په توګه ټاکل شوی دی، د یو لړ مراسمو په ترڅ کې د دغه ولایت د مرستیال او سرپرست له خوا کارکوونکو او مسوولینو ته وپېژندل شو.
د فاریاب ولایت د عدليې رئیس د پېژندنې په مراسمو کې چې د دغه ولایت د غونډو په تالار کې جوړ شوي وو، د دغه ولایت د ټولنیز مرستیال، د ولایتي شوری مرستیال، د دولتي ادارو رئیسان، د مدني ټولنې استازو او د دغه ولایت د عدليې ریاست یو شمیر کارکوونکو شتون درلود.
د فاریاب ولایت مرستیال او سرپرست ښاغلي الحاج عبدالمقیم راسخ د دغه ولایت د عدليې رئیس په توګه د ښاغلي رحماني د پېژندنې پرمهال، دغه منصب یې هغه ته مبارکي وویله او د چارو پرمخبیولو کې د بریا هیله ورته وکړه. ښاغلی راسخ د فاریاب ولایت د عدليې رئیس ته هرکلۍ وویله او په دغه ولایت کې د ادارو ترمنځ د همغږۍ پر پیاوړتیا ټینګار وکړ.
د فاریاب ولایت د عدليې نوي رئیس هم د عدليې وزارت د رهبرۍ له باور څخه مننه وکړه او ژمنه يې وکړه چې د دغه ریاست د ستونزو د حلولو په لاره کې هر ډول هڅې ته ژمن دی.
په پای کې د فاریاب ولایت د عدليې رئیس د دغه ولایت د مرستیال او سرپرست، ټولنیز مرستیال، د ولایتي شوری مرستیال او نورو مل همکارانو له لوري خپل کاري دفتر ته لارښودنه وشوه.
