د غزني ولایت د مقام او عدلیې رياست ترمنځ د همغږۍ ناسته جوړیدل

 د غزني ولایت د عدلیې رئيس مولوي مطيع الحق عثمان او له هغه سره مل پلاوي د یاد ولایت د والي له مرستيال حافظ عبدالرشيد عمري سره د همغږۍ ناسته جوړه کړه.
په دې ناسته کې د عدلیې رئيس د یاد رياست د کړنو او لاسته راوړنو په اړه معلومات ورکړل او زياته یې کړه چې خلکو لپاره د عدلیې رياست د خدماتو وړاندې کولو بهیر په عادي توګه روان دی. هغه ډاډ ورکړ چې په دې برخه کې له نورو ادارو سره همغږي او همکاري هم شتون لري.
نوموړي د ځينو کاري ستونزو او ننګونو یادونه هم وکړه او د حل په برخه کې یې د ولایت له مقام او نورو سیمه ییزو ادارو څخه د همکارۍ غوښتنه وکړه. 
په ورته مهال، د غزني د والي مرستيال د عدلیې ریاست کړنې او لاسته راوړنې وستایلې او د ستونزو د لرې کولو او د همکارۍ او همغږۍ په برخه کې یې ډاډ ورکړ.