د عدلیې وزارت مسلکي معین د تخار ولایت له والي او نورو سیمه ییزو مسؤولینو سره وکتل
د افغانستان اسلامي امارت د عدلیې وزارت د مسلکي معين، شيخ الحدیث مولوي عبدالکريم حيدر په مشرۍ د یاد وزارت د پلاوي د سفرونو په لړ کې، یاد پلاوي د ربیعالاول د میاشتې په ۷ مه نېټه د سهشبې په ورځ تخار ولایت ته سفر وکړ.
یاد هیأت د تخار ولایت والي مولوي عبید الله امین زاده او د یاد ولایت د استیناف محکمې له رئیس مولوي ابو یوسف ابوالوفا سره وليدل او په تخار ولایت کې د عدلیې رياست د شته ستونزو په اړه خبرې وکړې او د ستونزو د لرې کولو په موخه یې د همکارۍ غوښتنه وکړه.
همدارنګه، په دې سفر کې مسلکي معين، د تخار ولایت د عدلیې له ریاست څخه هم ليدنه وکړه.
نوموړي د یاد رياست د کارمندانو د فعاليتونو د څرنګوالي له نږدې څارنه وکړه او هغوی ته د کارونو د ښه پرمخ وړولو په موخه لازمې توصیې او لارښوونې وکړې.
په ورته مهال، د عدلیې وزارت مسلکي معين د تخار ولایت له یو شمېر مدافع وکيلانو سره هم ناسته جوړه کړه او د هغوی ستونزې واورېدلې او د حل په موخه يې هغوی ته ډاډ ورکړ.
د عدلیې وزارت پلاوی په پام کې لري چې د عدلیې ریاستونو د فعالیتونو د بررسۍ او د یادو ریاستونو له لارې خلکو ته د خدمتونو د وړاندې کولو د پیاوړتیا په موخه د هېواد نورو ولایتونو ته هم سفر وکړي. له دې وړاندې یاد پلاوی بغلان او سمنګان ولایتونو ته تللی وو او خلکو ته د یاد ولایت د عدلیې ریاستونو د خدمتونو وړاندې کولو څرنګوالی بررسي کړی وو.
