د عدلیې وزارت مسلکي معین او ورسره مل پلاوي د کندهار ولایت د عدلیې ریاست څخه لیدنه وکړه
د عدلیې وزارت پلاوي د یاد وزارت د مسلکي معین، محترم شیخ الحدیث مولوي عبدالکریم حیدر په مشرۍ د ولایتونو د عدلیې ریاستونو څخه د نظارت په دوام، د محرم د میاشتې په ۱۸مه نېټه د شنبې په ورځ کندهار ولایت ته سفر وکړ.
د عدلیې وزارت مسلکي معین او ورسره مل پلاوي د یاد سفر په ترڅ کې د کندهار د عدلیې ریاست، د دغه ولایت له دارالتأدیب او په سپین بولدک ولسوالۍ کې د عدلیې ریاست له انسجام مدیریت څخه لیدنه وکړه او د دغو ادارو د فعالیتونو او خلکو ته د خدمتونو وړاندې کولو څرنګوالی یې له نږدې بررسي کړ.
محترم شیخ الحدیث مولوي عبدالکریم حیدر د کندهار د عدلیې ریاست له مسؤولینو او کارکوونکو سره په کتنه کې وویل چې په نظام کې مسؤولیت ستر امانت دی ځکه چې د یوه کس امانت نه دی بلکې د ټولو خلکو امانت دی. هغه څرګنده کړه چې امانت باید اهل ته وسپارل شي او په نظام کې د مسؤولیت ادا کولو لپاره د اهلیت تر ټولو مهمه شرط علمیت دی.
نوموړي د کاري چارو په ترسره کولو کې د اخلاص، صداقت او نیت پر اهمیت ټینګار وکړ او ویې ویل چې زموږ او ستاسو تر ټولو مهم مسؤولیت هغو خلکو ته خدمت کول دي چې د اسلامي نظام د ټینګښت لپاره یې هر ډول قرباني ورکړې ده. هغه ټینګار وکړ چې مسؤولین نهباید د خلکو او مراجعینو کار وځنډوي.
همداراز د عدلیې وزارت مسلکي معین او مل پلاوي یې د یاد سفر په ترڅ کې د کندهار ولایت له دارالتأدیب او په سپین بولدک ولسوالۍ کې د عدلیې ریاست د انسجام آمریت له انسجام مدیریت څخه لیدنه وکړه، د دغو برخو فعالیتونه یې نظارت او بررسي کړل او د هغو له مسؤولینو سره یې خبرې وکړې.
یاد پلاوي د درې واړو برخو د مسؤولینو او کارکوونکو کاري ستونزې واورېدې او د ستونزو د حل او د کاري نیمګړتیاوو د لرې کولو په برخه کې لازمې لارښوونې وکړې.
د کندهار ولایت د عدلیې ریاست، دارالتأدیب او د سپین بولدک ولسوالۍ د انسجام مدیریت مسؤولینو هم په خپلو خبرو کې ډاډ ورکړ چې کاري ستونزې به حل او نیمګړتیاوې به هوارې کړي او د خلکو د خدمت په لاره کې به لهپخوا څخه لا زیاتې هلې ځلې وکړي.
ټاکل شوې ده د عدلیې وزارت پلاوی د دغه وزارت د مسلکي معین په مشرۍ د هېواد ټولو ولایتونو ته سفر وکړي او د ولایتونو د عدلیې ریاستونو فعالیتونه او خلکو ته د خدمتونو وړاندې کولو څرنګوالی له نږدې بررسي کړي.
