د عدلیې وزارت د مرکزي رئیسانو اداري ناسته تر سره شوه
د افغانستان اسلامي امارت د عدلیې وزارت د مرکزي رئیسانو اداري ناسته د شوال المکرم په ۲۹ نېټه د یکشنبې په ورځ د دې وزارت د مسلکي معین شیخ صاحب عبدالکریم حیدر په مشرۍ ترسره شوه.
په دې ناسته کې ولایتونو ته د لېږل شوو پلاوو د سفریې، د کارکوونکو د غرمې ډوډۍ د برابرولو د څرنګوالي، د مجاهدینو د درملنې ستونزې په ۳۰۰ بستر او ۴۰۰ بستر روغتونونو کې، د ولایتونو د عدلیې ریاستونو د محافظینو رسمي کیدنه، د سلسله مراتبو پر بنسټ د ریاستونو د ستونزو د حل، د ولایتونو د کارکوونکو د حاضرۍ او نورو مسائلو په اړه، بحث او خبرې وشوې.
په دې ناسته کې پرېکړه وشوه چې مسلکي معین صاحب به په ۳۰۰ بستر او ۴۰۰ بستر روغتونونو کې د مجاهدینو د درملنې ستونزې له اړوندو مسؤولینو سره شریکې کړي. په همدې توګه پرېکړه وشوه چې د ستونزې د رامنځ ته کیدو په صورت کې دې هڅه وشي چې رامنځ ته شوې ستونزه اړوند ریاست کې حل شي که چېرې ستونزه لویه وه او په اړوند ریاست کې نه حل کیدله نو په دې صورت کې دې له معین صاحب یا وزیر صاحب سره شریکه شي.
په همدې توګه د ولایتونو د کارکوونکو د حاضرۍ په اړه، هم تصمیم ونیول شو چې د یو متحدالمال لیک په ترڅ کې د ولایتونو د عدلیې له ریاستونو څخه وغوښتل شي چې د کارکوونکو د حاضرۍ په برخه کې جدي پاملرنه وکړي او کارکوونکي دې حاضرۍ ته پابنده و اوسي.
