د عدلیې وزارت د تشو بستونو د رقابتي ازموینې له بهیر څخه د یاد وزارت د اداري معین څارنه
د اسلامي امارت د عدلیې وزارت د رجب المرجب د میاشتې په ۲۵ نېټه د سه شنبې په ورځ د یاد وزارت د حقوقي مرستو ریاست د ۵ تشو بستونو ازموینه د آزادې سیالۍ له لارې واخیسته.
په دې ازموینې کې چې د عدليې وزارت په مقر کې جوړه شوه، د عدلیې وزارت مالي او اداري معین مولوي عبدالغني فایق، د بشري سرچینو رئیس مولوي رحمت الله حلیم، د حقوقي مرستو رئیس مولوي رحمت الله حقاني او د یاد وزارت نورو مسؤولینو حضور درلود او د ازموینې له بهیر څخه يې څارنه وکړه.
د ازموینې په پیل کې د عدلیې وزارت مالي او اداري معین او نورو مقاماتو د ازموینې د بهیر له روڼتیا څخه ډاډ ورکړ او له هغوی سره یې د ازموینې د څرنګوالي په اړه لازم معلومات شریک کړل.
په دغې ازموینې کې د ګډون لپاره ۱۴۶ تنه په شرایطو برابر پېژندل شوي وو او د هغوی له جملې څخه ۱۱۶ تنو په ازموینه کې ګډون وکړ او د یادو بستونو ترلاسه کولوپه موخه یې په خپلو کې رقابت وکړ.
