د سرپل ولایت د ځمکو د غصب د مخنیوي د تخنیکي هیئت ناسته جوړه شوه
د سرپل ولایت د ځمکو د غصب د مخنیوي د تخنیکي هیئت ناسته ددغه هیئت د رئیس او غړو په حضور سره جوړه شوه او دغه ولایت کې له ځینو ساحو څخه لیدنه او بررسي وشوه.
په دغې ناسته کې، تخنیکي هیئت په خانقاه ملکي کې د څړځای ځمکو په تړاو د یو شخص دعوا او د بل شخص لخوا یې په کروندې تبدیلول بررسي کړل. یاد شوي هیئت یو ټیم موظف کړ چې له نږدې څخه د ساحې لیدنه وکړي او جي پي اس یې کړي او دغه ځمکې بیاځل په څړځای تبدیلې کړي.
دغه راز په یاده ناسته کې، د نیمدان کلي پر اوسیدونکو د کلتر او ګل قشلاق اوسیدونکو د دعوا په اړه له کمېسیون څخه استول شوی لیک بررسي شو او تصمیم ونیول شو چې د دواړو لورو ترمنځ پریکړه او د هیئت ابلاغیه له مرکزي کمېسیون سره شریکه کړل شي.
د یو بل شخص د شخصي ملکیتونو او څړځای د غصب دعوا هم په دغې ناسته کې بررسي شوه او د دعوا له داوړو لورو څخه سندونه وغوښتل شول او د سندونو او مدارکو د نه وړاندې کولو په دلیل، یاده شوې قضیه د امارت د قضایاو آمریت ته راجع شوه.
دغه راز، د څړځای د غصب په اړه د ګوسفندي ولسوالۍ د آقګبند کلي پر یو شمېر اوسیدونکو د یو شخص دعوا د دواړو لورو په حضور کې بررسي شوه او پریکړه وشوه چې هیئت سیمه عمومي څړځای اعلام کړي او دواړه لوري له دغې ساحې څخه ګټه پورته کړي.
له غونډې څخه وروسته تخنیکي هیئت په دوو ګروپونو وویشل شو او د ساحوي اجراآتو په غرض خانقاه ملکی او د پشت قره کلیو ساحو ته ولاړل.
یاد شويو ګروپونو خپل اجراآت په ساحو کې ترسره کړل او له متصرفانو څخه یې قانوني سندونه وغوښتل. د پشت قره ساحې متصرفانو تر راتلونکې سه شنبې وخت وغوښت.
