د جوزجان ولایت د تخنیکي هیئت د ناستې جوړیدل او د یاد ولایت له والي سره کتنه
د جوزجان ولایت د ځمکو د غصب د مخنیوي د تخنیکي هیئت ناسته د ذوالحجې د میاشتې په ۷ نېټه د یکشنبې په ورځ د دغه هیئت د رئیس او غړو په حضور سره جوړه شوه او د مرکز په چهل مرد کلي کې د یو شخص له خوا د امارتي غصب شوې ځمکې بشپړ شوی راپور په کې وړاندې شو او د تائید وړ وګرځید.
په دغې ناسته کې، په قرقین ولسوالۍ کې د ښوونې د ریاست د معلمینو ښارګوټي غصب شوې ځمکې موضوع هم بررسي شوه او پریکړه وشوه چې د قضيې د لورو سندونه بررسي شي او ورپسې هیئت د سندونو تطبیق په موخه ساحې ته ولاړ شي.
په همدې توګه په یاده ناسته کې، د جوزجان د بېلابېلو کلیو د ساحو په اړه د هیئت د بررسیو او څېړنو د پرمختګ راپور وړاندې شو او دغې برخه کې لازمې لارښوونې وشوې.
تخنیکي هیئت د جوزجان له والي سره هم وکتل او د ترسره شوو فعالیتونو، لاسته راوړنو، ننګونو، د خپلو اړتیاو په اړه نوموړي ته راپور وړاندې کړ.
د جوزجان والي د هیئت فعالیتونه وستایل او رضایت څرګند کړ او د دغه هیئت د فعالیتونو د چټکتیا په اړه لازمې لارښوونې وکړې. په همدې توګه نوموړي له تخنیکي هیئت سره د همکارۍ ژمنه وکړه.
