د جلال آباد ښار د بېلابېلو ناحیو له اوسیدونکو سره د ځمکو د غصب د مخنیوي کمېسیون د مشرتابه پلاوي کتنه
د ځمکو د غصب د مخنیوي او د غصب شویو ځمکو د استرداد کمېسیون مشرتابه پلاوي د ۱۴۴۴ هجري قمري کال د شعبان میاشت په ۲۳ نېټه د چهارشنبې په ورځ د عدلیې وزارت د سرپرست شیخ الحدیث مولوي عبدالحکیم شرعي په مشرۍ او د کور او ښار جوړولو، لوی څارنوالۍ او د چارو د ادارې د سرپرستانو، د کرنې او اوبو لګولو وزارت د معین، د ځانګړې محکمې د رئیس او اړوند غړو په ګډون د جلال آباد ښار د بېلابېلو ناحیو له اوسیدونکو او مشرانو سره د جلا ناستو په ترڅ کې وکتل او خبرې ورسره وکړې.
دغې ناسته کې، د یاد کمېسیون مشرتابه پلاوي د جلال آباد ښار د لومړۍ، پنځمې، شپږمې، اوومې، اتمې او نهمې ناحیو له اوسیدونکو او مشرانو سره ددغه ولایت د ښاروالۍ په مېلمستون کې د جلا کتنو په ترڅ کې وکتل او په دغو ناحیو کې د غصب شویو امارتي ځمکو او ځینو ښارګوټو او مارکیټونو په اړه یې له هغوی سره بحث او خبرې وکړې.
د یاد کمېسیون مشرتابه پلاوي ددغو ناحیو د اوسیدونکو ستونزې او غوښتنې واوریدلې او له هغوی څخه یې د هغوی په تصرف کې د ځمکو قانوني سندونه وغوښتل او د قانون او شریعت په چوکاټ کې یې د ترحم او شفقت په اړه هغوی ته ډاډ ورکړ.
