خوست ولایت ته د ځمکو د غصب د مخنیوي کمېسیون د استول شوي پلاوي سفر
د ځمکو د غصب د مخنیوي او د غصب شویو ځمکو د استرداد کمېسیون یو پلاوي د عدليې وزارت د امارت د قضایاو لوی رئیس او د کمېسیون سکرتر مولوي احسان الله وثیق په مشرۍ د خوست ولایت د تخنیکي هیئت د فعالیتونو او اجراآتو بررسۍ په منظور یاد ولایت ته سفر وکړ.
یاد پلاوي د ذوالحجې د میاشتې په ۲۲ نېټه د دوشنبې په ورځ د خوست د ځمکو د غصب د مخنیوي د تخنیکي هیئت له رئیس او غړو سره وکتل او د یاد هیئت یو لړ اداري او کاري ستونزې واوریدلې او د هغو د حل په برخه کې بحث او د نظرونو تبادله ترسره شوه.
د مرکزي کمېسیون استول شوي پلاوي د تخنیکي هیئت د غړو په ملتیا د خوست له والي سره هم وکتل او یو لړ مهم موضوعات یې له نوموړي سره شریک کړل.
په همدې توګه استول شوي پلاوي د تخنیکي هیئت له فعالیتونو څخه نظارت ترسره کړ او پر هغو ترسره شوي سندونه او اجراآت يې بررسي کړل او د هغو د تشو او نیمګړتیاو د حل په برخه کې لازمې لارښوونې وکړې.
د کمېسیون استول شوي پلاوي د سندونو او دوسیو په تړاو له اړوندو ادارو څخه د معلوماتو غوښتلو په برخه کې او د بشپړ شوو دوسیو د راپور ترتیب په برخه کې هم تخنیکي هیئت ته لازمې لارښوونې وکړې.
