حقوقي مساعدتونو ته لاسرسی، زیاتوالی مومي

د افغانستان د اسلامي جمهوریت د عدليې وزارت له مشارکتي بنسټ سره د همکاریو هوکړه لیک لاسلیک کړ.

دغه مشارکتي بنسټ له څلورو ګډو بنسټونو څخه چې د افغانستان د پراختیا او بیارغونې د همغږۍ  موسسه، د افغانستان د مدني ټولنې د مجتمع موسسه، د بشر د حقوقو او د تاوتریخوالي د له منځه وړلو موسسه او  د CAID بین المللي دفتر پکې شاملېږي، جوړ شوی دی.

دغه هوکړه لیک د دوشنبې د غويي په ۲۰ مه نېټه د عدليې وزارت د مالي او اداري معین ښاغلي ګل محمد ګلزي او د افغانستان د پراختیا او بیارغونې د همغږۍ  د موسسې د اجرايي رئیس عزیز احمد جامي په واسطه چې د دغه  مشارکتي بنسټ رهبري پر غاړه لري، لاسلیک شو.

دغه هوکړه لیک، حقوقي مساعدت ته د لاسرسي د زیاتوالي د پروژې د تطبیق او په افغانستان کې عدلي او قضايي بنسټونو  ته د ځواب ورکونې لپاره د مدني ټولنې د رول د پیاوړتیا په منظور لاسلیک شو نومورې پروژه د اروپا د اتحاديې په واسطه تمویلېږي او د ۲۰۲۲ د نومبر تر پایه، په کابل، هرات، بلخ، سمنګان، بادغیس، غور، دایکندي او بامیان ولایتونو کې د مشارکتي بنسټ په واسطه تطبیقېږي.

دغه پروژه د لویي څارنوالۍ له محترمې ادارې سره د اروپا د اتحاديې د هوکړې یوه برخه ده چې ټول لګښت يې له یو میلیون او ۴۹۶ زرو یورو څخه زیات دی او ۹۰ سلنه يې د اروپا د اتحاديې او پاتې ۱۰ سلنه يې د مشارکتي بنسټ د غړو په واسطه تمویلېږي چې له هغه څخه عدليې وزارت ته ځانګړې شوې بودجه له ۲۸۸ زرو یورو څخه زیات دی.

۳۰ زره ښځو او ماشومانو ته د حقوقي خدمتونو او حقوقي مساعدتونو وړاندې کول، د حقوقي عامه پوهاوي ورکونې د برنامو جوړول، ۳۶۰ کلو او ۴۰ ولسوالیو کې د سیمې پر بنسټ د بشري حقوقو د ۴۰۰ کمېټو رامنځته کول، د ولایتونو او ولسوالیو په کچه د کړنو د بررسۍ د سیستم رامنځته کول او په ښې خدمت رسونې کې د مرستې او تر پوښښ لاندې ولایتونو کې د ادارې د ښه والي لپاره د عدالت غوښتنې په موخه د څارنوالۍ له ریاستونو سره د همکارۍ لپاره د مدني ټولنو د ۸ شبکو رامنځته کول د دغې پروژې په برنامو کې شامل دي.

په دغه بنسټ کې شاملې موسسې هر یوه تر پوښښ لاندې ولایتونو کې د دغې پروژې د پلي کولو مسوولیت پر غاړه لري.