بلخ ولایت کې د ځمکو د غصب د مخنیوي او د غصب شوو ځمکو د استرداد کمېسیون د سیمینار جوړیدل
د ځمکو د غصب مخنیوي او د غصب شوو ځمکو د استرداد کمېسیون د جمادي الاول میاشت په ۶ نېټه د چهار شنبې په ورځ ددغه کمېسیون د مقررې او لایحې او د غصب د مخنیوي په اړه د امیرالمومنین حفظه الله د فرمان د تشریح په منظور یو ورځنی سیمینار جوړ کړ.
په دغه سیمینار کې چې په بلخ ولایت کې جوړ شو، د عدلیې وزارت سرپرست او ددغه کمېسیون رییس شیخ الحدیث مولوي عبدالحکیم شرعي، د یاد کمېسیون غړو او د شمال د ۹ ولایتونو ادارو رییسانو چې په ولایتونو کې ددغه کمېسیون د تخنیکي هیئتونو غړیتوب لري، ګډون کړی وو.
په دغه سیمینار کې، د ځمکو د غصب مخنیوي او د غصب شوو ځمکو د استرداد کمېسیون د مقررې، لایحې او د ولایتونو د ادارو رییسانو اړوند د نورو موضوعاتو په اړه مفصل معلومات وړاندې شول.
د عدليې وزارت سرپرست د خپل وینا په لړ کې د ځمکو د غصب مخنیوي او د غصب شوو ځمکو د استرداد کمېسیون غړي معرفي کړل او د ځمکو د غصب مخنیوي او د غصب شوو ځمکو د استرداد کمېسیون د مقررې او لایحې او په دغې اړه د امیرالمومنین حفظه الله د فرمان او د یاد کمېسیون د پریکړو په اړه یې ګډونکوونکو ته معلومات وړاندې کړل.
په یاد سیمینار کې، د کور او ښار جوړولو وزارت سرپرست، د کار او ټولنیزو چارو وزارت سرپرست، د کرنې، اوبو لګولو او د مالدارۍ وزارت سرپرست او د لوی څارنوالۍ سرپرست هم په دغه سیمینار کې ګډون درلود او وینا يې وکړه. هغوی د ولایتونو له تخنیکي هیئتونو څخه وغوښتل چې د دولتي ځمکو د غصب د مخنیوي په برخه کې فعاله ونډه ولري او د ځمکو د غصب مخنیوي د مقررې او لایحې او د امیرالمومنین حفظه الله د فرمان د بشپړ تطبیق برخه کې، هڅه وکړي.
په دغه سیمینار کې، ګډونکوونکي خپل مسوولیتونو ته متوجې کړل شول او هغوی ته لازمې لارښوونې وشوې چې د ځمکې د غصب د مخنیوي برخه کې لازم او بنسټیز اقدامات ترسره کړي.
د یادولو وړ ده چې د ځمکو د غصب مخنیوي او د غصب شوو ځمکو د استرداد د کمېسیون مقرره په ۴ فصلونو او ۲۱ مادو کې ترتیب شوې او د عالیقدر امیرالمومنین حفظه الله له لوري توشیح شوې ده.
