د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته جوړېدل
د ځمکو له غصب څخه د مخنیوي کمېسیون رهبرۍ د عدلیې وزیر او د کمېسیون رئیس، محترم شیخ الحدیث مولوي عبدالحکیم شرعي په مشرۍ په یوې ناسته کې د هېواد په بېلابېلو ولایتونو کې د زرګونو جریبو ځمکو موضوعات بررسي کړل.
په دې ناسته کې چې د شوال د میاشتې په ۱۸ نېټه د یکشنبې په ورځ د عدلیې وزارت په مقر کې ترسره شوه د کرنې او اوبو لګولو وزیر محترم مولوي عطاءالله عمري، د کور او ښار جوړلو وزیر محترم مولوي نجیب الله حقاني، د سرحدونو، قومونو او قبایلو وزارت معین محترم مولوي عنایت الله شجاع، د چارو ادارې عمومي رئیس محترم مولوي نورالحق انور، د کرنې وزارت د اراضۍ رئيس محترم مولوي محمود مظلوم، د سترې محکمې استازي محترم مولوي محمد حماد، د امارت د قضایاوو عمومي رئیس او د کمېسیون سکرتر محترم مولوي احسان الله وثیق او نورو مسؤولینو ګډون درلود.
د ځمکو له غصب څخه د مخنیوي کمېسیون رهبرۍ په دې ناسته کې د کابل په شیرپور ساحه کې د ځمکو، د دهسبز ولسوالۍ د للمي ځمکو، د کاپیسا ولایت په دشت عاشقان کې د څه باندې ۷۴۰۰ جریبه ځمکې د موضوعاتو په هکله بحث وکړ او همداراز د شخصي تثبیت شویو ښارګوټو لپاره د ګمارل شوي پلاوي راپور یې واورېد.
کمېسیون د دهسبز ځمکو د تصفیې په منظور د کمېسیون د سکرتر، محترم مولوي احسان الله وثیق په مشرۍ یو پلاوی هم توظیف کړ. کمېسیون د کاپیسا ولایت د دشت عاشقان ځمکې په اړه هم پرېکړه وکړه چې په دې برخه کې له اړوندو ادارو څخه بشپړ معلومات وغوښتل شي او په هکله یې تصمیم ونیول شي.
