د انسان له قاچاقو او د مهاجرانو له قاچاقو سره د مبارزې عالي کمېسیون غونډه جوړه شوه
د ۱۳۹۷ کال د وږي ۹
دغه غونډه د افغانستان د اسلامي جمهوریت د عدليې د وزیر جلالتمآب ډاکتر عبدالبصیر انور په مشرۍ، دانسان له قاچاقو او د مهاجرانو له قاچاقو سره د مبارزې د عالي کمېسیون د ۱۳۹۷ کال د رپوټ د بشپړولو، په افغانستان کې د انسان د قاچاقو د وضعیت په اړوند د امریکا د بهرنیو چارو وزارت د کلني رپوټ په باره کې د خبرو، د دې کمېسیون په واسطه د ترسره شویو فعالیتونو او د انسان د قاچاقو د قربانیانو د میکانیزم د تائید په هکله، جوړه شوه.
د عدليې وزیر د انسان له قاچاقو سره د مبارزې په لاره کې د لاسته راوړنو په باره کې خبرې وکړې او ويې ویل: د امریکا د بهرنیو چارو وزارت د کلني رپوټ په باره کې زیاتو خبرو ته اړتیا احساسېږي. د افغانستان دولت د انسان د قاچاقو له پدیدې سره د مبارزې په برخه کې زیاتې هځې کړې دي چې له نیکه مرغه د دغو هڅو پایله مثبته ده. دغه راز په نظامي قطعاتو کې د اطفالو له استخدام څخه د مخنیوي په لاره کې خاصه پاملرنه شوې ده. هغه دغه راز زیاته کړه چې باید ډیر ژر د انسان له قاچاقو سره د مبارزې د عالي کمېسیون رپوټونو وروستي کړو او په یوه مطبوعاتي کنفرانس کې یې خپاره کړو ترڅو د ناوړو تبلیغاتو مخه ونیول شي. د عدليې وزیر وویل: په هڅه کې دی چې د انسان له قاچاقو سره د مبارزې ولایتي کمېسیونونه زیات فعال شي.
د عدليې وزیر د جزا کود ته په اشارې سره وویل چې په دې قانون کې یې زیاتې هڅې شوې دي چې د بین المللي کنوانسیونونه او د هغو په وړاندې زمونږ هېواد ژمنې په پام کې ونیول شي، د یو هرارخیز او بشپړ قانون رامنځته شي په دې قانون کې د انسان د قاچاقو او د مهاجرانو د قاچاقو د جرم لپاره درانده مجازات په پام کې نیول شوي دي او د افغانستان دولت د انسان له قاچاقو سره د مبارزې اوپه لاره کې د قوانینو د تدویت لپاره مهم ګامونه اخیستې دي.
د دې کمېسیون د یوه غړې د څرګندونو له مخې، د کورنیو چارو وزارت امنیتي ځواکونه ټول بایومتریک شوي دي چې په دې اساس اطفال د هغو ترمنځ شتون نه لري.
د غونډې د کار په دوام د عدليې وزارت د بشر د حقوقو رئیس او د انسان له قاچاقو او د مهاجرانو له قاچاقو سره د مبارزې د عالي کمېسیون د سکرتریت مسؤل نایف ریاضت د دې کمېسیون د کړنو په هکله معلومات ورکړل، د انسان د قاچاقو د قربانیانو د رجعت ورکولو د میکانیزم برابرول، د سیمه ییزو همکاریو د دوو غونډو جوړول او د انسان له قاچاقو سره د مبارزې د نړیوالې ورځې جوړول يې ددې کمېسیون له لاسته راوړنو څخه وبلل.
د هغه د څرګندونې له مخې له ګاوندیو هېوادونو سره د همغږۍ د غونډو جوړول، د ولایتي کمېسیونونو ارزونه او پیاوړتیا، د غړو ترمنځ د وړیا تیلفوني کړخو رامنځ ته کول، د انسان له قاچاقو سره په مبارزه کې د عالمانو د رول جوتول او له ګاوندیو هېوادونو سره د هوکړه لیک د مسودې په هکله کار د هغو فعالیتونو له جملې څخه دي چې په راتلونکې کې به د هغو په باب کار وشي.
په دې غونډه کې د انسان له قاچاقو سره د مبارزې د عالي کمېسیون د غړو ادارو استازو په یادو شوو موضوعګانو خبرې وکړې او د امریکا د بهرنیو چارو وزارت د رپوټ په باره کې يې غور وکړ. هغوې د امریکا د بهرنیو چارو وزارت د رپوټ پرخلاف، د انسان له قاچاقو سره د مبارزې په لاره کې د خپلو ادارو لاسته راوړنې جوتې بولي.
