د کنړ ولایت د عدلیې ریاست او د خیریه بنسټونو مسؤولینو ترمنځ د همغږۍ ناسته ترسره شوه
د کنړ ولایت د عدلیې رئيس، مولوي روح الله روحاني د ذوالقعدې د مياشتې په ۵مه نېټه د چهارشنبې په ورځ، د یو شمېر خيريه بنسټونو له مسؤولینو سره د عدلیې رياست په مقر کې د همغږۍ ناسته ترسره کړه.
د دې ناستې په ترڅ کې چې د عدلیې ریاست یو شمېر نورو مسؤولینو هم پهکې ګډون درلود، له ګاونډیو هېوادونو څخه د تازه راستنو شویو کډوالو سره د مرستو کولو په اړه خبرې وشوې. د عدلیې رئیس ټینګار وکړ چې خیریه بنسټونه دې له کډوالو سره د حرفوي زده کړو د زمینې برابرولو، د اوسېدو لپاره د مناسبو ځایونو چمتو کولو او د ژوند د لومړنیو اړتیاوو د پوره کولو په برخه کې لازمې مرستې وکړي.
په ورته مهال، د خیریه بنسټونو مسؤولینو په دې ناسته کې د همکارۍ ډاډ څرګند کړ او زیاته یې کړه، چې له راستنېدونکو کډوالو سره به لازمې مرستې وکړي او د هغوی د ستونزو د حل په برخه کې به له اړوندو ادارو سره ګډه همکاري وکړي.
