د ارزګان ولایت د عدلیې ریاست او استیناف محکمې ترمنځ د همغږۍ ناسته ترسره شوه
د ارزګان ولایت د عدلیې رئیس، مولوي خیرالله حقنما د شوال د میاشتې په ۱۸مه نېټه، د یکشنبې په ورځ، د یاد ولایت د استیناف محکمې له رئیس، شیخ محمود ابوالفیض سره د همغږۍ ناسته ترسره کړه.
په دې ناسته کې چې د عدلیې ریاست یو شمېر نورو مسؤلینو هم ګډون درلود، د عدلي او قضایي ارګانونو ترمنځ د همغږۍ پر پیاوړتیا، د قضیو پر اغېزمنې څېړنې، د ښو خدمتونو وړاندې کولو او د امارت د قضایاوو اړوندو دوسیو د منظم ترتیب او وړاندې کولو په اړه هر اړخیز بحث وشو.
د عدلیې رئیس په دې ناسته کې د عدالت د تأمین او د قانون د حاکمیت په برخه کې د محکمو رول مهم وباله او ټینګار یې وکړ چې محکمې کولای شي په جزایي قضیو کې بېوزله تورن او شکمن کسان د عدلیې ریاست د حقوقي مرستو آمریت ته معرفي کړي تر څو هغوی ته لازمې حقوقي مرستې وړاندې شي.
په ورته مهال، د ارزګان ولایت د استیناف محکمې رئیس د عدلیې ریاست سره د هر اړخیزې همکارۍ ژمنه وکړه او په راتلونکې کې یې د ورته ناستو پر دوام او د لا زیاتو همکاريو او همغږيو پر پیاوړتیا ټینګار وکړ.
