د پروان ولایت عدلیې رياست او مدافع وکيلانو ترمنځ د همغږۍ ناسته جوړیدل
د پروان ولایت عدلیې رئيس، مولوي حيات الله امين د ربیع الاول د مياشتې په ۳۰ مه نېټه د پنجشنبې په ورځ د یاد ولایت له یو شمېر مدافع وکيلانو سره د عدلیې رياست په مقر کې وليدل.
په دې ناسته کې چې، د مدافع وکیلانو او عدلیې رياست ترمنځ د همغږۍ او همکارۍ د پیاوړتیا په موخه جوړه شوه، د عدلیې رئيس پکښې د مدافع وکيلانو د ستونزو د پېژندلو او د حل په برخه کې پر همکارۍ ټينګار وکړ او له هغوى څخه يې وغوښتل چې خپلې ستونزې، خنډونه او ننګونې د عدليې له رياست سره شريکې کړي.
په دې ناسته کې د یاد ولایت مدافع وکيلانو هم له عدلیې رئیس او د عدلیې ریاست نورو مسؤولینو سره هغه ستونزې چې په محکمو کې ورسره مخ دي شریکې کړلې.
په یاده ناسته کې د پروان ولایت د عدلیې رياست مسؤولینو ټينګار وکړ چې، یادې ستونزې به له اړوندو ادارو سره شريک کوي او د حل په برخه کې به یې په ګډه کار وکړي.
