د کابل ښار په څلورمې ناحيې کې له ٢٤ دارالوکالو څخه نظارت او بررسي ترسره شوه
د عدلیې وزارت د مدافع وکیلانو د ریاست نظارتي پلاوي د کابل ښار په څلورمې ناحیې کې له ٢٤ دارالوکالو څخه کنترول او نظارت ترسره کړ او د هغو متصدیانو ته یې لازمې توصیې وکړې.
دغه پلاوي، د جمادي الاول میاشتې په ۱۸ نېټې د شنبې په ورځ د کابل ښار په څلورمې ناحیې کې ۱۴ دارالوکالې بررسۍ او کنترول لاندې ونیولې چې له دغې جملې څخه ۲ دارالوکالې د مدافع وکیلانو د انسجام کړنلارې مادو د نه رعایت کولو په دلیل، وتړل شوې او ۵ نورې دارالوکالې چې د هغو د وکالت مهر د هغو د فعالیت ناحیې سره مطابقت نه درلود، د هغو مهرونه قید شوو ترڅو متصدیان یې د مدافع وکیلانو ریاست ته مراجعه وکړي او د خپلو مهرونو په بدلولو اقدام وکړي.
دغه پلاوي د تېرې اوونۍ په دوشنبې ورځ هم په یادې ناحیې کې له ۱۰ دارالوکالو څخه نظارت ترسره کړ چې له دغې جملې څخه ۱ دارالوکاله چې د جواز موده یې پای ته رسیدلې وه او ۴ نورې دارالوکالې چې د هغو د فعالیت ځای د هغو له جواز سره مطابقت نه درلود، د هغوی مهرونه یې قید کړل او د هغو متصدیانو ته توصیه وکړه ترڅو د خپل د فعالیت ځای د خپل جواز مطابق تنظیم کړي.
