په کندز ولایت کې څه دپاسه د ۳۷۹ جریبه ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته د ربیع الثاني د میاشتې په ۷ نېټې د یکشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په دغې ناسته کې، د امام صاحب د ولسوالۍ د اسکي ساحې د ۳۵۰ جریبه ځمکې دوسیه او د حاجي نماز عسقلان ساحې د ۲۹ جریبه ځمکې دوسیه بحث او بررسۍ لاندې ونیول شوې او یادې شوې ځمکې استرداد شوې او له غیر شرعي ذوالید سره یې د یو کال مودې لپاره د اجارې ورکولو د پړاونو تېرولو لارښوونه صادر شوه.
دغه راز په یاده ناسته کې د حاجي خال الدین کلي ساحې د ۲۰ جریبه ځمکې دوسیه، د بحث او بررسۍ لاندې ونیول شوه او امارتي تثبیت شوه او د ساحې د بررسۍ او د هغو اړوندو څېړنو بشپړولو په منظور له تخنیکي هیئت څخه یو ټیم توظیف شو.
د علي آباد ولسوالۍ د لاله میدان ساحې د ۳۳ جریبه ځمکې دوسیه هم په دغې ناسته کې بحث او بررسۍ لاندې ونیول شوه او د یادې ځمکې د متصرفینو د سندونو تطبیق او د ساحې د بررسۍ په منظور له تخنیکي هیئت څخه یو ټیم توظیف شو ترڅو څېړنې یې بشپړې کړي او د هغې راپور وړاندې کړي.
