د لوګر ولایت له عدلیې ریاست څخه د عدلیې وزارت د نظارتي هیئت لیدنه او بررسي
د عدلیې وزارت نظارتي هیئت د یاد وزارت د مدافع وکیلانو د رئیس مولوي سیدحبیب الحبیب په مشرۍ او د حقوقي مساعدتونو رئیس مولوي رحمت الله حقاني، د جمعیتونو او ټولنیزو بنسټونو د چارو رئیس مولوي محمد یاسین حقاني او د عدلیې وزارت نورو مسلکي غړو په غړیتوب، د ربیع الاول د میاشتې په ۸ نېټې د شنبې په ورځ د لوګر ولایت له عدلیې ریاست څخه لیدنه وکړه.
یاد هیئت د لوګر ولایت د عدلیې له رئیس او د دغه ریاست له کارمندانو سره وکتل او د یاد ریاست له بېلابېلو برخو څخه یې لیدنه وکړه. یاد هیئت د دغه ریاست د کارمندانو ستونزې او غوښتنې واوریدې او د هغو د حل په برخه کې لازمې لارښوونې وکړې.
یاد شوي هیئت د دغه ریاست له مسؤلینو سره ژمنه وکړه چې د هغوی ستونزې به د عدليې وزارت له مقاماتو سره شریکې کړي او د هغو د حل په برخه کې به له هیڅ ډول هلو ځلو څخه ډډه و نه کړي.
دغه راز یاد هیئت د لوګر ولایت له والي مولوي ضیاءالرحمن مدني سره وکتل او د عدلیې ریاست ستونزې یې له نوموړي سره شریکې کړې او له عدليې ریاست سره د ولایت د همکارۍ غوښتونکی شو. د لوګر والي هم یاد هیئت ته له عدلیې ریاست سره د هر ډول همکارۍ ډاډ ورکړ.
