د عدلیې وزارت جومات د یو لړ مراسمو په ترڅ کې پرانیستل شو او ګټې اخیستنې ته وسپارل شو
د افغانستان اسلامي امارت د عدلیې وزارت په محوطې کې ودان شوی جومات شریف د صفرالمظفر د میاشتې په ۱۸ نېټې د دوشنبې په ورځ د یو لړ مراسمو په ترڅ کې د عدليې وزارت د سرپرست شیخ الحدیث مولوی عبدالحکیم شرعي، د مسلکي معین شیخ الحدیث مولوي عبدالکریم حیدر، د مرکزي رئیسانو، د دغه وزارت د مسؤلینو او د کارمندانو او د رسنیو په حضور سره پرانیستل شو.
د عدلیې وزارت سرپرست د خپلو خبرو په ترڅ کې د دغه جومات د پرانیستلو مبارکي وویله او زیاته یې کړه چې د یاد جومات په ودانولو کې له لوړو او با کیفیته موادو څخه ګټه اخیستل شوې ده. نوموړي له هغو کسانو څخه چې د یاد جومات په جوړولو کې مادي او غیرمادي مرستې کړي او د دغه جومات په جوړولو کې هلې ځلې کړي مننه او قدرداني څرګنده کړه او د لوی څښتن تعالی له دربار څخه یې استدعا وکړه چې اجر او ثواب د هغوی په برخه کړي.
نوموړي وویل چې لوی څښتن تعالی موږ ته د جومات د جوړلو امر کړی او د جومات له جوړولو څخه مراد د جومات ظاهري ودانول نه دي بلکې د جومات معنوي او باطني ودانول دي چې په هغه کې د لمونځ، عبادت او ذکر په ترسره کولو سره تحقق مومي. نوموړي د یاد وزارت له کارمندانو څخه وغوښتل چې د جوماتونو معنوي ودانولو ته توجه وکړي او د جماعت له ترسره کولو څخه څو شیبې مخکې جومات ته حاضر شي او خپل لمونځ په جماعت سره ادا کړي.
په دغو مراسمو کې د عدلیې وزارت مسلکي معین هم د جومات د موقف او فضیلت او په جماعت سره د لمونځ ترسره کولو په تړاو خبرې وکړې ویې ویل چې د جومات په جوړولو کې دنیوي او اخروي دوه موخې نغښتې دي. نوموړي وویل چې په جوماتونو کې پخ راټولیدو او پنځه وخته لمونځ ترسره کولو سره مسلمانان د یو بل له احوالاتو څخه خبریږي او د هغوی ترمنځ د یووالي، اتفاق او همکارۍ سبب ګرځي. نوموړي زیاته کړه چې جومات هغه وسیله او موقف دی چې الله تعالی د هغه په وسیلې پر انسان رحم کوي او په هغو کې دعا او عبادت د الله تعالی د قبولیدلو وړ ګرځي او الله تعالی، انسان د عفوې او بښنې لاندې راولې.
په دغو مراسمو کې د یاد وزارت د تقنین لوی ریاست مرستیال او سرپرست مولوي رکن الدین هم د موضوع په تړاو خبرې وکړې او د جومات د لویي په اړه یې خبرې وکړې او د دغو مراسمو له ګډونوالو څخه یې وغوښتل چې خپل لمونځونه په جومات کې ادا کړي او د جوماتونو په نظافت، پاکۍ او په ساتنه کې برخه واخلي او خپل مسؤلیت ادا کړي.
د عدليې وزارت جومات په ۶۵۰ متر مربع مساحت کې په دوو پوړونو کې د ورځې له معیارونو سره سم په عصري او پوخ ډول ودان شوی او په یو وخت کې د ۱۵۰۰ تنو لمونځ کوونکو ظرفیت لري.
دغه جومات د ستندرد د تهويې په سیستم او د غږيز په سیستم سره سمبال دی او په عصري وسایلو سره سمبال د اودس ځای لري چې د د جوړولو کار یې د ۱۴۴۳ هجري قمري کال د شعبان د میاشتې په ۲۳ نېټې پیل شوی او د ۱۴۴۵ هجري قمري کال د صفرالمظفر د میاشتې په ۱۸ نېټې ګټې اخیستنې ته وسپارل شو.
