په لغمان ولایت کې ۱.۵ جریبه ځمکه د هغې اصلي مالکانو ته وسپارل شوه
د لغمان ولایت د ځمکو د غصب د مخنیوي د تخنیکي هیئت ناسته د محرم الحرام د میاشتې په ۲۰ نېټه د یکشنبې په ورځ د دغه هیئت د رئیس او غړو په حضور سره جوړه شوه او په هغې کې د تېرې ناستې له پریکړو څخه بیاکتنه وشوه.
وروسته تخنیکي هیئت د یاد ولایت په مرکز کې د سلطان غازي بابا ښارګوټي ته روان شو او په دغې ساحه کې ۱.۵ جریبه ځمکه د هغې اصلي مالکانو ته وسپارله.
یاده شوې ځمکه وړاندې د مهترلام ښار د ښاروالۍ له لوري د دغه ښار دوه تنو اوسیدونکو ته ویشل شوې او د مؤقت ملکیت سند هم هغوی ته ورکړل شوی وو خو یاده شوې ځمکه د یو شمېر نورو افرادو له خوا غصب او ډبرې په کې کارول شوي دي.
تخنیکي هیئت یاده شوې ځمکه سندونو او سوابقو ته په کتلو سره د هغې اصلي مالکانو ته وسپارله او هغوی هم ژمنه وکړه چې د کور او ښار جوړولو وزارت له نقشي سره سم به په دغې ځمکه کې ودانیز کارونه پر مخ یوسي.
