د بدخشان ولایت د ځمکو د غصب د مخنیوي د تخنیکي هیئت د ناستې جوړیدل
د بدخشان ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د محرم الحرام میاشتې په ۱۳ نېټه د یکشنبې په ورځ د دغه هیئت د رئیس او غړو په حضور سره جوړه شوه او راغ ولسوالیو ته د تخنیکي هیئت د سفر په اړه په کې بحث وشو او تصمیم ونیول شو چې تخنیکي هیئت راتلونکې اوونۍ یادو ولسوالیو ته سفر وکړي.
په یاده ناسته کې، د کرنې ریاست څخه د ۷۹۸ جریبه ځمکې د بررسۍ او استرداد له پاره استول شوې دوسیه بحث لاندې ونیول شو او پریکړه وشوه چې راغ ولسوالیو څخه له بېرته راستنیدو وروسته موضوع بررسي او په اړه یې لازم اجراآت ترسره شي.
دغه راز په یاده ناسته کې د یاد ولایت د مرکز په اومې ناحیې کې د ۱۴۴ جریبه ځمکې اړوند د لعل بدخشان څیړنیز فارم دوسیه چې د مرکزي کمېسیون له خوا مسترد شوې، غونډې کې مطرح او پریکړه وشوه چې فني ټیم د امنیه قوماندانۍ د مرستیال په همغږۍ د محرم میاشتې په ۱۴ نېټه د دوشنبې په ورځ ساحې ته ولاړ شي او د خپل اجراآتو راپور راتلونکې غونډې ته وړاندې کړي.
دغه راز د ټولګټو ریاست د ۳۲ جریبه ځمکې د ملکیت موضوع چې د کشم ولسوالۍ د بلوڅو کلي درې تنو اوسیدونکو غصب لاندې ده، غونډې ته مطرح شوه او تصمیم ونیول شو چې تخنیکي هیئت د محرم میاشتې په ۱۶ نېټه د چهارشنبې په ورځ د امنیې قوماندانۍ په همغږۍ یادې ولسوالۍ ته ولاړ شي او د هغې د استرداد په برخه کې اقدام وکړي.
