بادغیس ولایت کې څه دپاسه ۸۰ جریبه ځمکه تثبیت او تشخیص شوه
د بادغیس ولایت د ځمکو د غصب د مخنیوي تخنیکي هیئت د ۵ ورځني کاري سفر په ترڅ کې (ذوالقعدې ۲۱ تر ۲۵) پورې جوند ولسوالۍ ته ولاړ او دغې ولسوالۍ کې د امارتي ځمکو د بررسۍ او تثبیت په برخه کې لازم اقدامات ترسره کړل.
یاد شوي هیئت د دغې ولسوالۍ له مسؤلینو سره د همغږۍ ناسته جوړه کړه او د جوند ولسوالۍ د امارتي ځمکو او څړځایونو په اړه له هغوی سره خبرې وکړې.
دغه راز یاد هیئت د لاله بای په نوم د عامه څړځایونو ساحې ته ولاړ او د جوند ولسوالۍ او د تګاب عالم ولسوالۍ بېلابېلو ساحو څخه لیدنه وکړه او یادې ساحې د کادستر ټیم له خوا جي پي اس شوې.
یاد هیئت د جوند ولسوالۍ د بېلابېلو ساحو له مشرانو او سپین ږیرو سره ناسته جوړه کړه او د دغه هیئت موخې په کې هغوی ته تشریح کړې او د امارتي ځمکو او عامه څړځایونو په اړه هغوی ته وضاحت ورکړل شو. یادو شویو مشرانو د عامه څړځای په ساحو کې د مالکیت ادعا درلودله چې له هغوی څخه د استعلام په ترڅ کې سندونه او معلومات وغوښتل شول.
یاد هیئت ۶۵۲۴ متر مربع وقفي ځمکه او ۷۸.۵ جریبه امارتی ځمکه تشخیص او تثبیت کړه چې له هغې څخه ۲۱.۵ جریبه غصب شوې ده. غاصب اشخاص جلب شوو او له هغوی څخه سندونه او شرعي مدارک وغوښتل شول.
