د بادغیس ولایت د ځمکو د غصب د مخنیوي د تخنیکي هیئت ناسته جوړه شوه
د بادغیس ولایت د ځمکو د غصب د مخنیوي د تخنیکي هیئت ناسته، د ذوالقعدې د میاشتې په ۱۸ نېټه د چهارشنبې په ورځ د هیئت د رئیس او غړو په حضور سره جوړه شوه او د ځینو موضوعاتو په اړه د بحث سربېره، د دغه ولایت د بېلابېلو ولسوالیو د اوسیدونکو سندونه او عریضې بررسي شوې.
یاد هیئت له زمند او نورخیل قومونو څخه چې د بالامرغاب او غورماچ ولسوالیو د عامه څړځای په ساحو د شخصي ملکیت ادعا درلودله، شرعي سندونه وغوښتل. یادې شوې ځمکې وړاندې بررسي شوې وې او یاد شویو قومونو غیر معتبر سندونه وړاندې کړي وو.
په دغې ناسته کې، د یو شخص وړاندې شوي سندونه چې پرې ادعا شوې وه د عامه څړځای ځمکه یې پلورلې ده، بررسي شول او پریکړه وشوه چې هیئت له نږدې څخه ساحه مشاهده کړي او سندونه طبیق کړي. قادس، تګاب عالم او جوند ولسواليو ته د هیئت د سفر پلان هم په دغې ناسته کې جوړ او ترتیب شو.
