سفید خار عالي لېسې کې د حقوقي پوهاوي ورکوونې برنامه جوړیدل
د ارزګان ولایت د عدليې ریاست د حقوقي مرستو آمریت د ذوالقعدې میاشتې په ۱۱ نېټه د چهارشنبې په ورځ د دغه ولایت په سفید خار عالي لېسې کې د حقوقي پوهاوي ورکوونې برنامه جوړه کړه.
په دغې برنامه کې د یاد ریاست د عامه پوهاوي مدیر مولوي عبدالرحیم د دغې لېسې زده کوونکو ته د ښوونې او د مور او پلار د حقونو د اهمیت په اړه پوهاوی ورکړ.
نوموړي د یادې لیسې له زده کوونکو څخه وغوښتل چې علم زده کړي او نورو ته یې هم ورزده کړي ځکه علم د انسان په ژوند کې خورا ډیر اهمیت لري او یواځي د علم د زده کړې له لارې انسان مقصد ته رسیږي. نوموړي وویل چې موږ او تاسې ټول باید علم زده کړو ترڅو روښانه راتلونکې ولرو.
دغه راز نوموړ ي د دغې لېسې له زده کوونکو څخه وغوښتل چې خپل مور او پلار ته احترام ولري او د هغوی په خبرو عمل وکړي. ځکه مور او پلار په خپلو اولادونو زیات حقونه لري او د پلار او مور دعا د انسان له پاره د دنیا او آخرت د ښېرازۍ سبب ګرځي.
