لغمان ولایت کې څه باندې ۹۸۰۰ جریبه ځمکه امارتي تثبیت شوه
د لغمان ولایت د ځمکو د غصب د مخنیوي د تخنیکي هیئت، د ذوالقعدې میاشتې په ۱۰ نېټه د سه شنبې په ورځ د امارتي ځمکو د تثبیت په منظور علینګار ولسوالۍ ته ولاړ او زرګونه جریبه امارتي ځمکې یې تثبیت او تشخیص کړې.
یاد شوي هیئت نیم ناني، قلعه ټک، مزري، ګلارام او کټه سنګ ساحې بررسي کړې چې په پایله کې ۹۸۴۷.۰۵ جریبه امارتی ځمکه دغو ساحو کې تثبیت او تشخیص شوې. پر یادو شویو ځمکو ځینو اشخاصو کورونه، سړې خونې او بڼونه جوړ کړي.
تخنیکي هیئت پر یادو شویو متصرفینو ټینګار وکړ چې د امیر المومنین حفظه الله د فرمان پر اساس هیڅوک حق نه لري چې پر امارتي، عامه مرعی او وقفي ځمکو تاسیسات جوړ کړي. دغه راز یاد هیئت وویل چې د دغه فرمان له سرغړونکو افرادو سره به قانوني چلند وشي.
