د کابل ولایت د شکردرې ولسوالۍ له مقاماتو سره د حقوقي مرستو د همغږۍ ناسته جوړیدل
د عدليې وزارت د حقوقي مرستو رئیس مولوي حافظ عبدالصمد عمري او له هغه سره مل پلاوي، د ذوالقعدې میاشتې په ۵ نېټه د پنجشنبې په ورځ د کابل ولایت د شکردرې ولسوالۍ له مقاماتو سره د دغه ریاست د حقوقي مرستندویانو او عامه حقوقي پوهاوي کاري ستونزو د هوارولو په منظور د هغمږۍ ناسته جوړه کړه.
په دغې ناسته کې د شکردرې ولسوال مولوي شریف الله مسلم، د محکمې قاضي، د امنیتي ادارو مسوولینو، د ښوونې آمر او د یادې ولسوالۍ نورو سیمه ییزو مسؤلینو ګډون کړی وو.
په دغې ناسته کې، د حقوقي مرستو رئیس، د حقوقي مرستو او د عامه حقوقي پوهاوي ورکوونې په برخه کې د عدلیې وزارت کاري برنامې بیان کړې او له هغوی سره یې د دغې ولسوالۍ له اړوندو ادارو سره د حقوقي مرستندویانو ستونزې شریکې کړې.
نوموړي د اړوندو ادارو ترمنځ پر لازیاتې همغږۍ ټینګار وکړ ویې ویل چې همغږي او ښې کاري اړیکې د دغو برنامو په تطبیق کې آسانتیاوې رامنځ ته کوي او د عدالت د پلي کیدلو سبب ګرځي. نوموړي وویل چې په همدې منظور دغه ناسته ترسره شوه ترڅو د ادارو ترمنځ د اړیکو او کارونو ستونزې حل شي او د یو بل په مرسته د عدالت د پلي کیدلو زمینه برابره کړي.
په دغې ناسته کې د شکردرې ولسوال د حقوقي مرستو د رئیس او د هغه د مل پلاوي له حضور څخه هرکلی وکړ او ښه راغلاست یې ورته وویل او د حقوقي مرستو کاري برنامې او د حقوقي پوهاوي ورکول یې د ټولنې او په ځانګړي توګه د دغې ولسوالۍ د خلکو له اړتیاو څخه وګڼل. نوموړي ژمنه وکړه چې د یادې ولسوالۍ په مربوطاتو کې د یادو شویو برنامه د تطبیق په برخه کې به له هیڅ ډول همکارۍ څخه ډډه و نه کړي.
