د میدان وردک ولایت له ځینو ساحو څخه د یاد ولایت د تخنیکي هیئت لیدنه
د میدان وردک ولایت د ځمکو د غصب د مخنیوي تخنیکي هیئت، د دوو کاري ورځو په ترڅ کې د دغه ولایت د مرکز او نرخ ولسوالیو کې ځینو ساحو ته ولاړ او د امارتي ځمکو د بررسۍ په برخه کې لازم اقدامات ترسره کړل.
دغه هیئت د نرخ ولسوالۍ په چغره کلي کې د ۵۴۷۶ کادستري ټوټې اړوند ۷۷۷ جریبه ځمکه بررسي کړه او تصرفات یې په دغې ساحه کې منع کړل او متصرفینو ته یې استعلام ورکړ ترڅو خپل سندونه حاضر کړي. یاد هیئت د دغې ساحې اوسیدونکو ته ډاډ ورکړ چې د هیچا حق به ضایع نه شي.
په همدې توګه هیئت په ۵۰۸۶ امارتي ټوټې ۵۴ جریبه ځمکه بررسی کړه او متصرفینو ته یې استعلام ورکړ. هیئت په ساحه کې تصرفات هم منع کړل او له متصرفینو څخه یې وغوښتل چې خپل د اعتبار وړ سندونه هیئت ته حاضر کړي.
دغه راز تخنیکي هیئت د دغه ولایت په مرکز میدان ښار کې د ښاروالۍ تر دعوا لاندې ساحه له نږدې څخه بررسي کړه.
